Interdependencias

Interdependencias activa un proceso de mediación artística a través da asociación Ambar coa idea de avanzar en modelos de vida non institucionalizados das persoas con diversidade funcional. Ambar traballa desde hai máis de 40 anos pola igualdade de oportunidades das persoas con diversidade funcional na comarca do Barbanza.

Pode unha institución centrada na vida das persoas con diversidade funcional desaparecer?

A institucionalización dos coidados das persoas con diversidade funcional supuxo un avance pero, e se a desinstitucionalización nos permitise ensaiar outras formas de estar en común?

A desaparición destas institucións podería significar que as persoas son partícipes nas decisións que afectan á súa vida e que, por tanto, deixaríamos de velas como suxeitos de asistencias para seren suxeitos de vida. Para acadar ese desexo profundo, primeiro precisamos imaxinalo. Propoñemos activar un proxecto artístico participativo que axude a pensar outros modos de relacionarnos máis interdependentes.

Unha sorte de micelio de relacións que se entretecen e que permiten avanzar no axenciamento da vida das persoas en xeral e das persoas con diversidade funcional en particular.

Que pode achegar a un territorio a mirada desde a diversidade?

Iniciamos un proceso de mediación cun grupo de comitentes conformado por 15 persoas usuarias de Ambar. A ese anel inicial de promotores iranse sumando progresivamente profesionais, familiares e persoas voluntarias da asociación, así como outras persoas da comunidade máis próxima. O obxectivo último é comandar unha obra artística coa que preguntarlle ao conxunto da sociedade como podemos desinstitucionalizar a vida das persoas con diversidade funcional.

Como imaxinamos a diversidade na vida comunitaria dunha comarca? Durante o proceso traballaremos fóra do edificio institucional, poñendo as condicións para que o proceso se vaia dando, os encontros coidados e porosos coa comunidade se vaian producindo e as interdependencias se vaian practicando.

O resultado final agardamos que sexa unha obra de arte que avance no soño inicial do que nace esta concomitancia: a desaparición da institución nas vidas das persoas con diversidade funcional.